Европската вселенска агенција соопшти дека слетувањето на леталото Schiaparelli на Марс не се одвивало според планот. Постојат индикации дека падобранот бил прерано активиран, а ракетите што требале да се активираат непосредно пред слетувањето функционирале прекратко.
Иако сè уште не е потврдено дали леталото се срушило, сепак прогнозите не се оптимистични. И понатаму се анализираат податоците и се обидува да се воспостави контакт со леталото, со надеж дека слетало на површината на Марс.
Во моментов, научниците работат на обработка на податоци што леталото Schiaparelli ги испратило на Trace Gas. Засега сè упатува на тоа дека процесот на слетување се одвивал како што треба, сè било во ред кога леталото влегло во атмосферата. Топлотниот штит ја завршил работата како што треба, падобранот се отворил за да го забави слетувањето, но во завршната фаза е забележано чудно однесување.
Според Андреа Акомазо, шеф на операцијата, сè уште се испитува по која логика леталото одлучило да го отвори падобранот, кој е дефинитивно прерано активиран во однос на очекувањата. Повеќето научници сметаат дека леталото со огромна брзина слетало на површината, но официјално ништо не е потврдено. Засега ништо не може да се потврди додека не се реконструира профилот на брзината. Ако леталото е навистина уништено тоа ќе биде тежок удар за Европската вселенска агенција, која во 2003 година доживеа неуспех со леталото Bigl 2.