Силен земјотрес со интензитет од 7,4 степени според Рихтеровата скала го погоди источниот брег на Јапонија. Епицентарот на земјотресот бил во префектурата Фукушима на 67 километри од градот Иваки. Властите издадоа предупредување за цунами, кое подоцна било повлечено. Во областа биле регистрирани бранови во висина од еден метар.
Десетина луѓе се повредени, а стотина евакуирани, како последица на силниот земјотрес (7,4 степени според Рихтер) кој го погоди источниот јапонски брег во префектурата Фукушима.
Јапонските власти издадоа предупредување за цунами, кое подоцна беше повлечено, откако најаваните бранови од три метри, во областа на Фукушима достигнале висина од најмногу еден метар.
Поради земјотресот, во еден момент бил запрен процесот во нуклеарната централа Фукушима, во делот каде се одложува потрошеното гориво, но по неколку часа нуклеарката продолжила да работи со целиот капацитет.
Портпаролката на Компанијата за електрична енергија информирала дека земјотресот не предизвикал штета во ниту една од електраните со кои управува компанијата.
Овој регион во март 2011 година го погоди силен земјотрес кој предизвика цунами, но и сериозни оштетувања во нуклеарната централа Фукушима. Тогаш од земјотресот и цунамито загинаа околу 16.000 луѓе, а 2.500 сè уште се водат за исчезнати.