Земјотрес со магнитуда од 5,6 по Рихтер го погоди источниот дел на Романија, а истовремено синоќа е регистриран потрес од магнитуда 6,3 на филипинскиот остров Минданао, објави американскиот Геолошки институт (USGS).
Земјотресот, првично проценет на јачина од 5,7 по Рихтер, го погодил источниот дел на Романија синоќа во 23:11 часот по средноевропско време. Епицентарот бил 149 километри северно од главниот град Букурешт. Бил почувствуван и во повеќе градови во соседна Украна, вклучително и престолнината Киев каде предизвикал непријатно чуство меѓу населението, пренесуваат тамошните медиуми.
Потресите со магнитуда од 5,7 по Рихтер се сметаат за земјотреси со умерена јачина, кои може да нанесат поголеми штети, а последиците од делувањето на овој потрес го ублажило тоа што неговото жариште било на длабочина од 91,25 километри.
Малку претходно истата вечер, околу 22:53 часот по средноевропско време, земјотрес со првично проценета магнитуда од 6,5 по Рихтер го погодил филипинскиот остров Минданао. Епицентарот на потресот бил на 114 километри источно од градот Давао, а на длабочина од 69 километри под морското дно, и не предизвика цунами.
Земјотресите со магнитуда 6,3 по Рихтер се сметаат за силни и можат да нанесат големи штети, но разорниот ефект од овој е ублажен бидејќи се случил на море и на голема длабочина.