Нова пропагандна порака во која се појавува синот на Осама бин Ладен може да биде доказ дека милитантната група се обидува да ја обнови својата глобална кауза со користење на новата генерација на семејството на Бин Ладен.
Во 10-минутната аудио порака илустрирана со снимки од последните терористички напади, Хамза бин Ладен се слуша како ги повикува следбениците да ги напаѓаат Евреите, Американците, луѓето од Запад, па дури и Русите, и тоа самостојно и со користење на какви било средства што се лесно достапни.
„Ако можете да се снабдите со огнено оружје, тоа е добро, ако не, има многу опции”, вели гласот во видеото.
„Хамза во овој момент се подготвува за голема улога во водењето на Ал Каеда, а веројатно и во обединувањето на глобалниот џихад”, вели Али Соуфан, поранешен агент на ФБИ, кој ја следи Ал Каеда.
За Хамза бин Ладен се верува дека има 28 години и е познат на милитантната публика бидејќи како момче беше вклучен на пропагандните видео снимки како држи автоматска пушка на неговиот татко или како учествува во милитантна обука со други момчиња.
„Тој има харизма и огромна способност за јавни обраќања уште од рана возраст”, изјави Соуфан.
Осама бин Ладен сакал неговите синови да му се придружат, но едниот од нив, Калид, беше убиен заедно со него во американскиот напад.