Европските фудбалски медиуми пренесуваат дека младата ѕвезда на Ајакс, Френки де Јонг се согласил да направи трансфер во Барселона, откако во изминатиот месец беше на мета на неколку гиганти од Стариот континент.
Младиот играч од средниот ред веќе подолго време се наоѓа на радарот на некои од најголемите европски клубови, поради неговите импресивни натпревари во дресот на Ајакс и холандската репрезентација.
Френки де Јонг (21) наводно веќе го договорил неговиот трансфер во шпанскиот шампион Барселона, притоа одбивајќи ги понудите од Манчестер Сити и ПСЖ. Според холандскиот De Telegraf, раководството на Барселона се согласило да исплати 90 милиони евра – повеќе од било кој од другите клубови.
ПСЖ имаше значително помала понуда за него, во висина од само 75 милиони евра, додека Манчестер Сити не можеше да си дозволи да потроши толкава сума поради тоа што веќе има насобрано поголем долг во Финансискиот фер плеј.
Холанѓанецот сезонава одигра 16 натпревари за Ајакс во првенството, притоа постигнувајќи 3 гола. Неговиот најголем квалитет е пас играта и тој е познат како еден од најдобрите млади плејмејкери во фудбалска Европа.