Серијата силни земјотреси што денеска го погодија скопскиот регион, ги натера скопјани панично да ги напуштат своите домови и привремено да се засолнат во блиските паркови.
По првиот утрински земјотрес, што се случи нешто пред седум часот, кој беше со јачина од 3,9 степени, граѓаните истрчаа веднаш во дворовите и парковите, но подоцна се вратија дома бидејќи во некои делови на градот започна да врне ситен дожд.
Втор силен земјотрес се случи попладнево во Скопје околу 15:10 часот, со јачина од 5,2 степени на Рихтер, според официјалната интернет страница на светската земјотресна опсерваторија EMSC. Епицентарот на потресот бил на длабочина од 4 километри на 6 километри источно од Скопје, 7 километри североисточно од Сопиште и 4 километри од Усје.
Втората серија потреси внесе дополнителна вознемиреност кај скопјани, па сега речиси низ целиот град парковите околу зградите се преполни со луѓе, со мали деца, изнемоштени и стари лица, кои ги напуштија повисоките катови на зградите и сега немаат смелост да се вратат.
Кај некои објекти се вклучија и алармите, што дополнително ја зголеми загриженоста.
Заради земјотресот, беа оптоварени и телефонските врски, па потешко се добиваше конекција, бидејќи луѓето постојано се јавуваат до своите блиски за да прашаат како се.