Сушите се кобни за животните во Националниот парк Хванге во Зимбабве.
Најмалку 55 слонови умреле од глад во Националниот парк Хванге во Зимбабве, како последица од сушата што трае веќе два месеца.
„Ситуацијата е тешка“, вели Тинаше Фараво, портпарол на ZimParks, организација што управува со бројните паркови во Зимбабве.
„Слоновите умираат од глад и тоа е огромен проблем“, додаде тој.
Сушата значително ги намали приносите од посевите во земјата. Една третина од населението не може да си дозволи храна поради тешката економска криза.
Во август беше објавен извештај на Светската програма за храна во кој се наведува дека постои опасност два милиони луѓе да умрат од глад во Зимбабве.
Локалните медиуми пренесуваат дека некои од телата на слоновите биле најдени на 50-тина метри од поставените поила, што покажува дека патувале од многу далеку и умреле пред да успеат да стигнат до нив.
Популацијата слонови во националниот парк придонесува и за уништување на вегетацијата во него - Хванге има капацитет за околу 15.000 слонови, а таму живеат повеќе од 50.000.
Вработените во ZimParks се обидуваат да копаат бунари, но им недостигаат финансии за да продолжат со овие активности. Државата не го финансира работењето на организацијата.
Единствено решение е да почнат да ги продаваат слоновите на странски паркови, но оваа пракса наидува на жестоко противење од експертите и активистите за заштита на животните кои нагласуваат дека тоа е трауматично за животните. Тие исто така предупредуваат дека животните најчесто завршуваат во кинески зоолошки каде условите не се на задоволително ниво.