Собранието со 90 гласови ги донесе измените на Законот за внатрешни работи, Законот за аудио и аудиовизуелни медиумски услуги, Изборниот законик, Законот за Влада по скратена постапка, а против пакетот измени гласаа независните пратенички Роза Топузова Кареска и Солза Грчева.
Овие измени беа договорени на средбите на партиите потписници на Пржинскиот договор, за одржување на предвремени парламентарни избори и за излез од долгата политичка криза.
Предлагачи на Законите беа координаторите на ВМРО-ДПМНЕ Илија Димовски, на СДСМ Горан Сугарески, заменик координаторот на ДПА Беким Фазлиу и пратеникот на ДУИ Артан Груби.
Со донесените измени Министерот за внатрешни ќе може да смени 15 раководни лица. Сто дена пред изборите ќе се формира Преодна Влада со двајца министри и тројца дополнителни заменици од опозицијата, која ќе си поднесе оставка дента кога ДИК ќе ги соопшти конечните резултати од изборите.
МРТВ ќе основа канал со програма само на албански јазик. Агенцијата за аудио и аудиовизуелни услуги ќе формира петчлено тело за набљудување на изборите. Имплементацијата на овие закони ќе ја оценат лидерите на 31 август и ќе проценат дали има услови за кредибилни избори.