Со одлука на Владата, потпишана од вицепремиерот и министер за здравство, Никола Тодоров, Влатко Илиевски, сопругот на поранешната министерка за внатрешни работи Гордана Јанкулоска, официјално е именуван за претседател на Инспекцискиот совет. Одлуката на Владата е објавена во „Службен весник“.
Сопругот на Јанкулоска претходно беше советник во кабинетот на тогашниот премиер Никола Груевски, а во 2013 година стана и независен член на одборот на директори на Македонската берза за хартии од вредност.
Потоа Илиевски беше избран за в.д. претседател на оваа институција, а сега и официјално застана на чело на Инспекцискиот совет. Оваа должност го става во позиција да биде прв човек на 28-те инспекциски служби.
Поради тоа што неговата сопруга се соочува со неколку истраги во кои е осомничена за дела што ги води Специјалното јавно обвинителство (СЈО), јавноста веднаш реагираше дека станува збор за очигледен непотизам. Покрај тоа, се поставува и прашањето дали можеби нема да стане збор за судир на интереси доколку СЈО во истрагите за неговата сопруга, побара информации од споменатите Државни инспекторати, на коишто сега шеф им е токму Илиевски.