Денес се очекува одлуката на селекторот на Англија Фабио Капело околу иднината на капитенот Џон Тери во националниот тим на Гордиот Албион.
Проблемите за Тери започнаа откако се обзнани неговата афера со бившата жена на Вејн Бриџ, Ванеса Перонсел. Толку. Доволно е за Англија.
Здравата критика која колку толку се грижи за фудбалот и само за фудбалот се надева дека овој приватен разговор на Капело и Тери ќе мине добро и Тери ќе ја продолжи својата кариера како капитен на Англија, меѓутоа јавноста на Островот која повеќе е заинтересирана за драматургии ги преиспитува позитивните и негативните страни во овој случај.
Па така како позитивни причини за непроменета судбина на Џон Тери се наведуваат фактите дека е поважен од Бриџ, дека во Челзи немаат проблем со оваа ситуација, нема кој да го замени и притисокот врз Руни ќе бида помал бидејќи медиското внимание ќе биде насочено кон Џон Тери.
Меѓу негативните кои стојат и во репортажата на ценетиот Еуроспорт, има една која е исклучително смешна (и поставена како прашање), а покажува зошто Англија ќе остане со прстот во уста уште долго, кога се во прашање фудбалските шампионати - Еуроспорт се запрашува, после избивањето на скандалот, „Дали тој треба да го подигне пехарот на СП?“.
И така и ќе остане. Освен ако Островјаните не почнат повеќе да се грижат за фудбалот, а помалку за сексуалниот живот на нивните „дежурни херои“.
Б.И. | Кајгана
