Директорот на Агенцијата за млади и спорт (АМС) Драган Ѓурчевски, претседателот на Македонскиот олимписки комитет (МОК) Васил Тупурковски и претседателот на Атлетската федерација на Македонија, Цветко Грозданов денеска го потпишаа Меморандумот за соработка и разбирање за проектот изградба на атлетска патека во Охрид.
Директорот Ѓурчевски изрази големо задоволство за проектот кој треба да биде реализиран до крајот на летово.
- Ние како владина институција која го помага спортот ќе се вклучиме во изградбата на патеката со сума од околу три милиони денари, средства кои ќе бидат употребени за целосна подготовка на теренот до поставувањето на патеката. Заедно со средствата кои МОК ги обезбеди од Меѓународната атлетска федерација, „Билјанини извори“ ќе го направиме еден современ атлетски центар, рече Ѓурчевски.
Целта, додаде тој, е подобрување на условите за атлетичарите, кои, како што рече, во моментов не се најдобри.
- Планираме по завршувањето на проектот свеченото пуштање во употреба да го одбележиме со организирање Меѓународен атлетски турнир каков што во Македонија одамна немало, истакна Ѓурчевски на денешната прес-конференција.
Тој додаде дека во соработка со Владата планираат изградба на уште една атлетска патека.
- Нема да застанеме тука и по завршување на патеката во Охрид, ќе се фокусираме на изградба на патеката во Скопје. Кога ќе заврши изградбата на Северната трибина на стадионот „Филип Втори“ во план е поставување модерна атлетска патека со осум стази, заврши директорот на АМС.
Васил Тупурковски и Цветко Грозданов искажаа голема благодарност до Агенцијата и Владата за нивното залагање околу подобрување на условите за работа на спортистите во атлетиката која се нарекува „Кралица на спортовите“ и изразија надеж за понатамошна успешна соработка.
Освен патеките, во Скопје и Охрид ќе бидат обезбедени сите неопходни инфраструктурни услови. Од Агенцијата велат дека ќе бидат набавени и сите реквизити потребни за техничките дисциплини.
