Пејачката Адел го убеди Spotify да ја отстрани опцијата shuffle од сите албуми за да може песните да се слушаат по редоследот што го замислил авторот на албумот, пишува BBC.
„Не ги создаваме албумите со толкаво внимание и не размислуваме за редоследот на песните без причина. Нашата уметност раскажува приказна што треба да се слуша како што е замислено. Ви благодариме Spotify што послушавте“, напиша Адел на Twitter.
Од стриминг платформата одговорија: „Сè за тебе“ и ја отстранија можноста слушателите да го менуваат редоследот на слушање на песните од албумот кога ќе се обидат да почнат да го слушаат од самата страница на албумот.
Сепак, симболот за shuffle - две вкрстени стрелки - сè уште се појавува на одделни страници на поединечни песни на албумите.
Ова значи дека сè уште може да започнете да слушате албум од која било песна и да изберете песни за репродукција по случаен редослед, но сепак е малку покомплицирано од претходно.
Копчето Shuffle уште се појавува и на плејлистите.
Албумот „30“ - нејзиниот прв албум по осум години - е достапен на Spotify од петокот. Ова е промена од нејзиниот последен албум „25“ кој може да се купи физички или да се симне од официјалниот сајт откако беше официјално објавен во ноември 2015 година. Стана најбрзо продаваниот албум во британската историја, симнат повеќе од 800.000 пати во првата недела.
На стриминг платформите како Spotify, Apple Music и Tidal, тој албум се појави дури во јуни 2016 година.
