Со најновите измени и дополнувања на Законот за семејство се укинуваат детските бракови во Србија.
За родителите кои договараат и дозволуваат бракови за нивните деца пред тие да станат полнолетни, законот предвидува кривични санкции.
Кривични санкции се предвидуваат и за полнолетни лица кои почнале да живеат со малолетно лице во заедница.
„Свесни сме дека со измените на Законот нема да ја спречиме оваа појава, но мора да нагласам дека ќе бидат предвидени кривични санкции за родителите кои дозволуваат или договараат вакви бракови, но и за полнолетни лица кои почнале заеднички живот со малолетно лице“, рече Драган Вулевиќ, специјален советник на српскиот министер за труд и социјална политика.
Тој наведе дека во Србија секоја година се склопуваат околу 2.000 бракови и дека со досегашниот закон на многу родители им се овозможувало „алиби за продажба на децата“ и дека сега било одлучено „да ѝ се застане на патот на оваа појава“.
Со измените на Законот, во брак ќе може да се стапи само со полни 18 години, нагласи Вулевиќ.