Србите веројатно ќе бидат единствениот учесник на првенството што ќе игра против суспендираната Русија.
Веќе извесен период се зборуваше за можноста Србија и Русија да одиграат пријателски фудбалски натпревар, а денеска стигна и конечната потврда на таа идеја, бидејќи двете страни се пофалија дека „Орлите“ и „Зборнајата“ ќе се сретнат во март следната година.
Ова ќе биде прв дуел на руската селекција со европска репрезентација откако ФИФА ги прекина сите нејзини официјални активности, а поради војната во Украина.
„Фудбалскиот сојуз на Србија се согласи да одигра два пријателски натпревари на А селекцијата во март 2024. Прв противник ќе биде Русија во Москва на 21 март на стадионот 'ВТБ Арена' на Динамо, додека вториот ривал ќе биде Кипар на 25 март во Лимасол“, соопшти Фудбалскиот сојуз на Србија.
Претходно истата вест до домашната јавност ја соопшти и претседателот на ФС на Русија, Александр Дјуков.
„Натпреварот против Србите е планиран за март и ќе се игра во март, потпишавме договор. Добивме дозвола од УЕФА, но сѐ уште сѐ може да се случи“, изјави Дјуков.
По избувнувањето на војната во украина, Русите беа домаќини на само три тима, сите од другите континенти - Ирак, Камерун и Куба, бидејќи само тие земји се осмелија да им пркосат на западните санкции.
За Србија овој двомеч ќе биде еден од тестовите пред Европското првенство во Германија каде ривали на селекторот Драган Стојковиќ и неговите избраници ќе бидат Англија, Данска и Словенија.
