Натпреварот Кливленд-Њујорк, кој ќе се игра вечерва од 01:30 часот, ќе го означи почетокот на 71-та сезона во најсилното кошаркарско натпреварување во светот, НБА лигата.
Актуелниот шампион Кливленд, со Леброн Џејмс, ќе ја отвори новата НБА сезона, против екипата на Њујорк, а во текот на ноќта ќе се одиграат уште два натпревари Портланд-Јута и Голден Стејт-Сан Антонио.
Според сите оние кои на било каков начин се инволвирани во случувањата во НБА лигата (тренери, коментатори, новинари, обични навивачи) и оваа сезона, исто како и во претходните две за титулата ќе се борат Кливленд и Голден Стејт.
Ако тоа се случи, тогаш прв пат во историјата на лигата ќе се случи две исти екипи да играат во три последовни финални натпревари. Прашање е само против кого тие ќе играат во конференциските финалиња, кои се увертира за големото финале и борбата за титулата.
Голден Стеј засилен со Кевин Дурент е најголемиот фаворит за прстенот, а на западот конкуренција можат да му бидат Сан Антонио, ЛА Клиперс, а можеби и Хјустон.
Слично е и на истокот, апсолутен фаворит е Кливленд, а во завршницата можат да влезат Торонто, Бостон или Индијана.