Американскиот Стејт департмент ги предупреди Американците на можна закана од терористички напади во Европа ова лето, порачувајќи им дека мета може да бидат туристички места, ресторани и важни настани, како што е Европското фудбалско првенство во Франција.
„Ги предупредуваме американските граѓани на опасност од можни терористички напади во Европа насочени против важни настани, туристички места, ресторани, трговски центри и јавен превоз“, порачува американското министерство за надворешни работи во предупредувањето до патниците што истекува на 31 август.
„Голем број туристи кои во летните месеци патуваат во Европа ќе бидат поголеми мети за терористите што планираат напади на јавни места, посебно на важни настани“, се вели во предупредувањето.