Експертите предвидуваат дека светот би можел да остане без чоколадо во наредните 40 години бидејќи со промените на климата, какао билката се бори да опстане во топлите временски услови.
Билката какао може да расте само 20 степени северно и јужно од Екваторот, и за билката да опстане и да продолжи да расте, потребно ѝ е доволно влага и големо количество дожд.
Меѓутоа, порастот на температурите за околу 2 степени поради глобалното затоплување би можел да ја уништи оваа билка во наредните 30-на години, а со самото тоа и целата индустрија за производство на чоколадо, соопштува американската Управа за океани и атмосфера.
Како што температурите се покачуваат и извлекуваат големи количества вода од тлото, научниците се надеваат дека ќе има доволно дождови за да може да се избегне изумирањето на какаото. Доколку дојде до ова, одгледувачите ќе мораат да ги преселат нивните плантажи на повисок терен.
Просечниот потрошувач од Западот годишно јаде 268 табли чоколадо.
Чоколадната индустрија се шири секоја година, а од 90-те години на минатиот век па наваму Кина, Индонезија, Индија, Бразил и Русија влегоа во пазарот за какао.