Светската здравствена организација (СЗО) објави 26 нови препораки за родилките во кои особено предупредува на сѐ поголемиот број медицински интервенции, како царски рез, што не се секогаш неопходни.
Родилките треба повеќе да соработуваат во донесувањето на одлуките во врска со породувањето и потребно е да се намали бројот на медицински интервенции за време на породувањето.
„Во последните 20 години имаме сѐ повеќе медицински интервенции што се непотребни за родилките“, вели Олуфеми Оладапо од Канцеларијата за репродуктивно здравје и истражување при СЗО.
„Во неколку светски региони станаа широко распространети зафати како царски рез или користење окситоцин за да се забрза породувањето“, додаде тој, алудирајќи на синтетизираниот облик на природниот хормон што во некои делови од светот се дава рутински на родилките интравенозно за да се провоцираат контракции, да се забрза породувањето и да се избегнат компликации.
СЗО објави дека досегашните истражувања укажуваат дека процентот на породувања извршени со царски рез од 10 до 15% не води до паѓање на стапката на смртност кај мајките или децата.
„Во средно развиените земји како Турција, кина, земјите во Латинска Америка и во Иран има висока стапка на царски резови, честопати без медицинска потреба“, вели Метин Ѓулмезоглу од СЗО.
Оладапо нагласи дека жените треба да имаат слобода да избираат во каква положба ќе се породуваат и да им бидат обезбедени лекови против болки.