Минатиот викенд Нико Розберг ја освои шампионската титула во Формула 1, а денеска изненадено објави дека става крај на кариерата.
„Oткако возам во овие 25 години, тоа беше мојот сон, мојата единствена работа да станам шампион во Формула 1. Низ сета напорна работа, болка, жртвување, тоа беше мојата цел. Успеав да го постигнам тоа, се искачив на планина и сега сум на врвот, така што моето чувство е правилно. Мојата најдлабока емоција сега е благодарноста кон сите кои ме поддржуваа тој мој сон да се оствари“, објави Нико на Facebook.
Тој им се заблагодари на сите во тимот, како и на својата сопруга Вивиен. Својот деби настан Нико Розберг го имаше пред десет години во Бахрејн, кога заврши на седмо место за Williams. Цели 10 години чекаше да ја освои шампионската титула, натпреварувајќи се во 206 трки. Денеска, сосем неочекувано, Нико Розберг најави дека се повлекува од Формула 1.
Шефот на Mercedes тимот, Тото Волф, изјави дека е изненаден од веста.
„Ова е храбра одлука на Нико, сведоштво за силата на неговиот карактер“, изјави тој, пренесува BBC.