Миле Јовановски, таткото на Бојан Јовановски познат како Боки 13, е осуден на затвор од шест месеци за нанесени тешки телесни повреди на попот Виктор Стојчев.
Обвинетиот Миле Јовановски не дојде да ја чуе пресудата на Кривичниот суд, а претходно ја призна вината. Казната за вакво дело е од 6 месеци до 5 години затвор. Тој доби минимална казна.
Според обвинението, Јовановски на 7 јануари 2017 година физички го нападнал попот Виктор Стојчев по расправија за паркинг место по што му нанел физички повреди, од кои и скршеница на зглобот на левата нога.
Оштетениот Стојчев пред медиумите изјави дека правдата е задоволена и дека сторителот ќе биде казнет. Пресудата не ја коментираше, но најави дека ќе бара отштета од Јовановски во граѓанска постапка.