Зошто копја, дискови и ѓуле, кога може и со мобилни телефони? Во Чернобио, Италија, се одржа првото првенство во фрлање мобилни телефони во далечина.
За успешност и регуларност на натпреварот, организаторите привлекоа голем број натпреварувачи со вкупно 2500 мобилни телефони во различни бои, но со иста тежина. Победник, секако, е оној кој ќе ја фрли својата скапаница од мобилен најдалеку, а наградите (веќе сигурно погодувате) се нови телефони и интересни гаџети.
Идејата за овој натпревар во дело ја спроведе еден млад Италијанец од Комо, кој за натпреварот успеа да привлече дури и меѓународни спонзори.
Целта на овој бизарен натпревар е да се фрли мобилниот телефон што е можно подалеку, а телефоните се фрлаат на било каква подлога - трева, песок, асфалт или бетон, без разлика дали е тоа на отворен или во затворен простор.
Луѓето се адаптираат на се' повеќе спортови кои со себе ги носи модерниот начин на живот. Ова е натпревар во кој дури и најголемите гикови би имале шанса за медал. За сега, сеуште нема никакви најави дали Италијанците планираат да го предложат фрлањето на мобилни телефони како олимписки спорт.
