Како што беше очекувано, играчите на Ливерпул и Манчестер Сити се најбројни во овогодинешниот Тим на сезоната во англиската Премиер лига. Двата тима кои се во мртва трка за титулата имаат вкупно десет играчи во идеалниот состав, додека Пол Погба е единствениот играч во составот кој не игра за еден од овие два тима.
Еден Азар, Мохамед Салах, Кристијан Ериксен и Кајл Вокер имаат за што да жалат, бидејќи гласачите решија дека тие не направија доволно за да обезбедат место во најдобриот состав во Премиер лигата оваа сезона.
На голот се најде бразилскиот голман Едерсон (Манчестер Сити), кој иако прими два гола повеќе од неговиот сонародник Алисон (Ливерпул) сепак доби предност кај гласачите. Во одбраната се најдоа тројца играчи на Ливерпул: Вирџил Ван Дајк, Енди Робертсон и Трент Александер-Арнолд, како и еден играч на Манчестер Сити – Ајмерик Лапорт.
Средниот ред е составен само од играчи од клубовите од Манчестер. Бернардо Силва и Фернандињо ја застапуваат сината страна на Манчестер, додека Пол Погба е единствениот фудбалер кој доаѓа од некој од останатите 18 клуба во лигата, кои не се викаат Манчестер Сити или Ливерпул.
Напаѓачкото трио го предводи Садио Мане (Ливерпул), а друштво му прават Серхио Агуеро и Рахим Стерлинг (двајцата од Манчестер Сити). Агуеро е единствениот играч кој се најде во идеалниот состав за минатата и оваа сезона.
Чудна е одлуката за изоставување на Еден Азар од тимот на сезоната, бидејќи Белгиецот пред само неколку дена беше ставен во скратената листа од шестмина фудбалери кои ќе се борат за наградата Играч на сезоната. Помеѓу значајните фудбалери изоставени од составот на сезоната се и Мохамед Салах, Пјер Емерик Аубамејанг, Кристијан Ериксен, Кајл Вокер и Алисон, кои имаа одлични сезони, но не беа изгласани во идеалната единаесеторка.