Тимот на економски советници на германската канцеларка Ангела Меркел речиси ја преполови прогнозата за раст во Германија за оваа година на 0,8 отсто.
Ова е најновото во низата намалувања на проекциите за економски раст на најголемото стопанство во Европа.
Во денешниот ажуриран извештај, панелот економисти ја намали прогнозата за раст за 2019 година од претходните 1,5 отсто, но наведе дека следната година би требало растот да се подобри на 1,7 отсто.
Ова намалување следи откако Европската комисија и Меѓународниот монетарен фонд ги намалија изгледите за раст на германскиот БДП за 2019 година.
Независни експерти излегоа со соопштение дека на ниската прогноза значително влијаеле дополнителните последици од слабите економски резултати на крајот на минатата година, кога стопанскиот раст во голема мера беше забавен од еднократни фактори поврзани со новите стандарди во автомобилската индустрија за дозволеното ниво на испуштени штетни гасови.
Германските автопроизводители тогаш се соочија со проблеми во врска со сертифицирање на возилата согласно новите, реални тестирања на испуштањето штетни гасови што стапија на сила на 1 септември.
Експертите исто така укажуваат на високите ризици ги носат неизвесноста од Брегзит и глобалните трговски спорови.
Крисоф Шмит, претседател на панелот економисти, рече дека „кулминацијата на германското закрепнување е завршена, но не се очекува рецесија со оглед на тоа дека има солидна домашна побарувачка.“