Некои луѓе навистина не знаат како да уживаат во филмовите. Колку и да се бориме против пиратеријата, изгледа дека таа ќе нѐ прогонува сѐ додека постојат луѓе кои се решени дека ќе ги прекршат правилата. Еден таков гледач го аплоудираше целиот филм на пиратска веб-страница.
Еден ден пред светската премиера на „Avengers: Endgame“, филмот стана достапен на интернет благодарение на некој „хуман“ фан кој реши да го сними целиот филм во кинеска киносала, бидејќи Кина доби шанса да го гледа овој филмски спектакл еден ден порано од остатокот од светот.
TorrentFreak излезе со соопштение дека интернет корисниците во Кина почнале да преземаат снимка од тричасовниот филм „Avengers: Endgame“ уште од вчера, а од денеска истиот фајл почна да се шири и кај европските веб-страници за пиратски торенти.
Последното поглавје од филмската франшиза на Marvel вчера ја доживеа кинеската премиера, еден ден пред неговата светска премиера. И секако, во една од салите се најде посветен фан кој успеа да ги сними сите три часа од филмот и подоцна да ги прикачи на интернет.
Снимката, како што велат од TorrentFreak, е со прилично лош квалитет, ротирана и полна со текст и реклами кои повремено се појавуваат на екранот. Иако од Marvel објавија дека најстрого осудуваат внесување на камери и снимање со мобилни телефони на било кој од нивните филмови, сепак постојат гледачи кои решаваат да не ги послушаат овие совети.
Почнувајќи од денеска, „Avengers: Endgame“ се наоѓа на редовниот репертоар на скопските кина Милениум и Синеплекс.
