Поранешниот американски претседател Доналд Трамп ги обвини властите во неговата земја дека „го принудиле“ рускиот претседател Владимир Путин да ја нападне Украина.
Во интервју за Real America's Voice, десничарска мрежа наклонета на Трамп, тој ја критикуваше администрацијата на Бајден. Изјави дека нивната реторика во месеците кои претходеа на инвазијата во Украина придонела за одлуката на Путин.
„Тие всушност го исмејуваат, ако реално погледнете. Нашата земја, но и нашето така наречено раководство, се потсмеваше на Путин. Реков дека скоро го тераат да влезе во тоа што го зборуваат. Таквата реторика беше целосно глупава“, вели Трамп.
Смета дека украинската инвазија никогаш немаше да се случи ако тој и понатаму беше претседател. Не објасни со конкретни примери како тоа САД се исмејувале со Путин да изврши инвазија на Украина.
Трамп исто така го пофали неговиот деловен однос со Путин и со украинскиот претседател Володимир Зеленски кога водителот Вејн Рут сугерираше дека Бајден би можел да го испрати Трамп да преговара за мировен договор.
„Јас многу добро се сложував и со Зеленски и со Путин“, рече Трамп.
Но, експерти сметаат дека инвазијата на Украина е нешто за што Путин размислувал многу години, со цел да ја прошири Руската Федерација.
