Американскиот претседател Доналд Трамп во телефонски разговор му порачал на турскиот претседател Реџеп Тајип Ердоган дека САД ја поддржуваат Турција како стратешки партнер и сојузник во НАТО, соопшти Белата куќа.
Трамп, во разговорот со Ердоган во вторникот, говорел и за заедничката посветеност на двете земји во борбата против тероризмот во сите облици и го поздравил доприносот на Турција во борбата против Исламската држава, се наведува во соопштението на Белата куќа, пренесува агенцијата Reuters.
Двајцата лидери истакнале дека Турција и САД се пријатели и сојузници, соопшти кабинетот на Ердоган.
Турција, како членка на НАТО која се граничи со Сирија, Ирак и Иран, е моќен играч во регионот, но односите на Ердоган со поранешниот американски претседател Барак Обама, како и со Западна Европа, повремено беа затегнати, потсетува Reuters.
Анкара беше бесна поради одбивањето на Вашингтон да го испорача свештеникот Фетулах Гулен, кој живее во САД, а кого Турција го обвинува за организирање неуспешен пуч во јули 2016 година.
САД и Турција се во конфликт и поради американската поддршка на сириските милитанти на Единицата за заштита на народот (YPG), која Анкара ја смета за терористичка организација.