Бројот на жртвите од налудничавото влетување на автомобил во група минувачи во петокот во австралискиот град Мелбурн се искачи на пет, објави полицијата на сојузната држава Викторија, додавајќи дека од здобиените повреди починало тримесечно бебе.
„Пет лица починаа како последица од инцидентот во Мелбурн. Меѓу загинатите се 10-годишно девојченце, тројца мажи и тримесечно момченце, кое почина изминатата ноќ во болница“, се наведува во соопштението.
Во болниците остануваат уште 37 лица, од кои состојбата на четворица лекарите ја оценуваат како критична.
Во петокот млад маж влета во мноштвото пешаци во самиот центар на Мелбурн. Според полицијата, тој намерно ги косел луѓето со возилото, но неговиот напад не го поврзува со тероризам, иако при апсењето пукал кон полициските службеници.
Возачот намерно влетал во толпата луѓе со брзина од околу 60 километри на час. Тој е приведен. Според локалните медиуми, станува збор за 26-годишен маж кој претходно на властите им бил познат по насилство, употреба на дроги и ментални проблеми.