По обидот за државен удар што се случи ноќеска во Турција силите лојални на актуелната власт успеаја да ја вратат контролата во најголемите градови.
Турскиот претседател Реџеп Ердоган се обрати до нацијата преку националната телевизија по воениот обид за државен удар. Тој изјави дека целата ситуација е завршена и дека сите вмешани лица ќе платат за обидот за рушење на легитимно одбраната власт.
Во конфликтот меѓу побунетата војска и полицијата, како и цивилите, убиени се најмалку 90 луѓе. Конфликтите најмногу се одвивале околу зградата на Парламентот и Палатата на претседателот. Војската пукала кон цивилите.
Ердоган успеа да дојде во Истанбул каде ги повика граѓаните да се борат против предавниците. Guardian пренесува дека се уапсени повеќе од 700 припадници од побунетиот дел на војската, а меѓу нив има и офицери кои биле организатори на државниот удар.
Од друга страна, војници од побунетата војска кои сè уште се на слобода велат дека борбата сè уште трае и дека државниот удар не е завршен.
Според Ердоган, виновник за државниот удар е Фетула Гулен, познат турски и верски лидер кој актуелната власт го смета за водач на терористичката организација FETO.
