Турција поништила патни исправи на речиси 11.000 лица, главно државни службеници, соопшти министерот за внатрешни работи Ефкан Ала, во врска со минатонеделниот неуспешен обид за воен преврат, а веќе се притворени 300 припадници на претседателската гарда и затворени се 1.669 приватни образовни институции.
Лицата чии пасоши се поништени, или се веќе во притвор, или се кријат, велат владини извори.
По неуспешниот пуч во кој загинаа 246 цивили и повеќе од 100 пучисти, а ранети е 2.185 лица, следеа масовни апсења и отпуштања од државните служби. Уапсени се повеќе од 10.000, уште 55.000 луѓе се отпуштени или суспендирани од работните места.
Приведени се илјадници војници, меѓу кои и 300 припадници на претседателската гарда кои се грижат за безбедноста на највисоките турски функционери, стотици судии и обвинители, како и полицајци. Масовните откази се спроведени во државниот апарат, во министерството за внатрешни работи, Националната разузнавачка организација (MIT), Главната управа за религија, министерството за образование и институциите кои се под него.
Претходно беше објавено дека од должноста се сменети 6.538 службеници на министерството за образование на различни нивоа.
Високиот совет за образование на Турција донесе забрана за патување во странство за универзитетските професори и научници, а од оние кои се веќе во странство побара итно да се вратат во земјата.