Москва, 19 септември 2019 (МИА) – Сибирски шаман кој пешки тргна на долг пат до Москва за да го истера претседателот Владимир Путин од Кремљ е уапсен од руската полиција, пренесуваат руски медиуми.
Полицијата на Бурјатија, руска република во источен Сибир, објави дека ноќеска го уапсила шаманот Александар Габишев на автопат кај Бајкалското Езеро. Тој бил вратен во родната Јакутија, каде го бараат поради извршено злосторство, соопшти полицијата. Сведоци велат дека шаманот бил одведен од 40 маскирани и вооружени лица.
50-годишниот Александар Габишев тргна пеш низ најголемата земја во светот во март и планираше да пристигне во Москва во 2021 година. Неговата желба беше да го избрка Путин откако ќе дојде во главниот град, велејќи за Путин дека е „ѕвер“ и „демон“ кој ќе ја разори земјата.
Во изминатите неколку недели, мала група следбеници, убедени од неговите изјави за рускиот претседател, му се придружија на патувањето од 5.000 километри помеѓу Јакутск и Москва. За него се снимени неколку репортажи објавени на руски државни канали, по што тој имал проблеми со локалните власти.