Малезиската полиција уапсила четири лица осомничени за убиството на 40-годишниот Ким Јонг-нам, полубратот на севернокорејскиот лидер Ким Јонг-ун.
Според малезиските медиуми, полицијата во Куала Лумпур уапсила маж кој наводно е поврзан со убиството на Ким Јонг-нам. Во моментот на апсењето кај него е пронајден пасош на Северна Кореја, а сега се проверува неговата валидност. Се истакнува дека во пасошот на приведениот маж имало штембили дека повеќепати престојувал во Малезија.
Полицијата прецизира во соопштение дека осомничениот е идентификуван како Ри Џонг-чол, роден на 6 мај 1970 година.
Покрај тоа, весникот China Press пишува дека полицијата распространила до сите полициски станици фотографии на четворица мажи, осомничени за убиството, по кои е распишана потерница.
Претходно беше објавено дека полицијата уапсила две жени за убиството на Ким Јонг-нам. Станува збор за 29-годишна државјанка на Виетнам и 25-годишна државјанка на Индонезија, а потоа е уапсен и 26-годишен државјанин на Малезија, кој бил во врска со Индонезијката.
Ким Јонг-нам почина оваа седмица по напад на меѓународниот аеродром во Куала Лумпур. Јужнокорејски и американски функционери соопштија дека го убиле агенти на Северна Кореја.
Северна Кореја соопшти дека категорично ќе ги отфрли резултатите од обдукцијата во Малезија и ја обвини оваа земја за „заговор со надворешни сили“, притоа алудирајќи на Јужна Кореја. Пјонгјанг го побара телото на Ким Јонг-нам веднаш да биде предадено, а претходно се обидуваше да ги увери малезиските власти да не ја направат обдукцијата.
