Полицијата во Босна и Херцеговина синоќа уапси три лица за кои постои сомневање дека се поврзани со бруталното убиство на двајца полицајци во центарот на Сараево. Двајца од осомничените по распитот се задржани во притвор, соопштија денеска официјални извори.
Припадници на државната полициска агенција СИПА во текот на ноќта во областа Рогатица во источна Босна уапсија три лица кои се верува дека се поврзани со автомобилската мафија. По распитот се предадени во надлежност на МВР Сараево.
Полицијата во Рогатица го најде автомобилот Range Rover што беше спомнуван во медиумските извешаи како возилото што го користеле лицата кои ги ликвидираа двајцата полицајци со огнено оружје. Во тек е вештачењето на возилото.
Едниот од уапсените ѝ е познат на полицијата од претходно
Локалните медиуми објавија дека апсењето во Рогатица се случило по подолго следење на сомнителни лица. Новинската агенција на Република Српска објави дека едниот од уапсените ѝ е познат на полицијата од претходно бидејќи бил уапсен и во рамки на акцијата „Волан“, најголемата истрага досега во БиХ во борбата против автомобилската мафија.
Во текот на акцијата за убиството на полицајците Адис Шеховиќ и Давор Вујиновиќ беа приведени и испрашувани повеќе од 80 лица и беа извршени рации на 12 локации. Полицајците беа убиени во раните утрински часови на 26 октомври откако наишле на возило пријавено за украдено. Двајцата беа убиени од рафален оган уште пред да излезат од службеното возило и не отвориле оган пред да биде пукано во нив.