Црн Lamborghini Huracan Performante одеднаш се запали во центарот на Бостон, а несекојдневната глетка го привлече вниманието на љубопитните минувачи кои веднаш ги извадоа мобилните телефони за да го снимат „ѕверот во пламен“.
Суперавтомобилот вреден 300.000 долари се запали сам од себе во петокот во близина на Јавната библиотека во Бостон.
Иако пожарникарите за кратко време стигнаа на местото на инцидентот и го изгаснаа пожарот, скапоцениот автомобил е сериозно оштетен и најверојатно му нема спас. Во пожарот за среќа, немаше повредени.
Точната причина за пожарот не е позната, но судејќи според снимките, огнот избил на задниот дел на скапиот спортски автомобил, во делот каде што е сместен моторот.
По гасењето на пожарот, пожарникарите дополнително го оштетија автомобилот бидејќи мораа да исечат делови од каросеријата за да проверат дали некаде во внатрешноста тлее оган.
Љубопитните минувачи го снимаа несекојдневниот инцидент и ги објавуваа снимките на социјалните мрежи небаре е некаква атракција, а не сериозен, потенцијално опасен инцидент. Не кои од нив дури и отворено „пукаа сеир“, дофрлаа шеги и позираа со запалениот скап автомобил.
Моделот Huracan Performante дебитираше на саемот за автомобили во Женева во 2017 година. Автомобилот користи 5,2-литарски V10 мотор со 631 кс, а од 0 до 100км/ч забрзува за 2,9 секунди.