На нешто помалку од месец дена до почетокот на континенталниот собир европската куќа на фудбалот ја објави и официјалната песна за натпреварувањето.
Нумерата го носи наслотот „We Are The People“ и е во изведба на Боно и The Edge заедно со реномираниот диџеј Мартин Гарикс.
Како што објаснува УЕФА, песната е напишана на начин за да ја слави радоста на фудбалот од ЕУРО 2020, еден од најголемите светски настани. Песната ги разгледува предизвиците со кои се соочува светот, додека истовремено бара заеднички одговор од сите. „We Are The People“ цели кон тоа да ја отслика позитивноста, надежта и одлучноста кои се потребни за една репрезентација да успее, како и да понуди чувство на заедништво, кое се вклупува и во слоганот на првентството - обединетост.
„Создавањето музика за еден од најголемите светски спортски настани заедно со Боно и The Edge беше едно неверојатно искуство. Многу сум горд на она што го остваривме заедно и сум возбуден што конечно можеме да го споделиме со светот“, рече Гарикс, пренесува УЕФА.
За прв пат едно Европско првенство ќе се игра низ целиот континент и тоа во 11 различни градови, сите од различни земји. Бројката требаше да биде 12, но Ирска со својата престолнина Даблин го изгуби домаќинлукот поради рестрикциите кои владеат во земјата.
ЕУРО 2020 почнува на 11 јуни со натпреварот од отворањето во Рим помеѓу Италија и Турција.
