Уставните судии и на денешната седница не донесоа одлука за иницијативата за оцена на уставноста и на законитоста на одлуката за поставување 55-метарски крст во скопската општина Бутел.
Според информациите од Судот, на денешната седница присуствувале осум судии, кои гласале изедначено, односно четворица биле за отфрлање, а четворица за прифаќање на иницијативата.
Иницијативата ќе биде повторно разгледувана на некоја од наредните седници на Уставниот суд, најверојатно на следната.
Ова е третпат да не биде донесена одлука за оваа иницијатива, која до судот во март годинава ја поднел струшкиот градоначалник Зијадин Села, според кого, одлуката за поставување крст во Општина Бутел не била во согласност со Бадинтеровиот принцип.
Поставувањето на крстот, кој е донација на Светскиот македонски конгрес (СМК), предизвика тензии откако членови на ДУИ и нивни поддржувачи поставија камп и протестираа против изградба, на што со контрапротести одговори СМК, чиј претседател Тодор Петров беше и физички нападнат дента по свеченоста за осветување на камен-темелникот.