Вардар повторно е осамен на челната позиција во Б групата, во ракометаната лига на шампиони, откако во дербито на шестото коло го совлада европскиот првак Кјелце со 40-34 (18-18).
Кјелце , против мотивираниот тим на Раул Гонзалес имаше нерешено нецели 40 минути, но потоа не успеа да го следи ритамот на „црвено-црните“. Одбраната предводена од Штербик и беспрекорниот напад ја направија разликата во овој натпревар.
„Одигравме против европскиот шампион со голема мотивација. Првиот дел не го одигравме најдобро, не успевавме да ги задржиме во нападот Агинагалде и Бомбач. Вториот дел беше подобар, Штербик имаше неколку одбрани, реализиравме неколку контри. Штерби, Карачиќ и Душебаев одиграа добар меч“, рече по мечот вардаровиот тренер Раул Гонзалес.
Вардар на оваа средба го предводеа Карачиќ со перфектна реализација и девет постигнати гола, а по еден помалку реалзиираа Дибиров и Душебаев.
Македонскиот шампион во наредното коло, на 17. ноември, ќе гостува кај Рајн Некар.
