Петти ден по ред граѓаните протестираа на улиците на Скопје, против одлуката на претседателот Иванов за аболиција на политичари осомничени за изборен криминал.
Вечерашниот протест, кој беше мирен, почна пред просториите на Специјалното јавно обвинителство (СЈО) во знак на поддршка на оваа институција. Демонстрантите од пред СЈО се упатија кон Собранието на Република Македнија, околу чија зграда имаше распоредено силно полициско обезбедување.
Демонстрантите повторно ја обоија фасадата на „Порта Македонија“ со јајца и боја испишувајќи разни графити на неа.
Од Собранието демонстрантите се упатија кон Владата на Република Македонија, а по извесно време таму, се упатија кон седиштето на ВМРО-ДПМНЕ, каде заврши протестот.
Според информации од социјалните мрежи, синоќа се одржале протести и во Струмица и Битола.
Граѓанското здружение „Протестирам“, кое се јавува како организатор на протестите, порачува истите да продолжат во понеделник, исто така од 18 часот.