Фудбал
КВАЛИФИКАЦИИ ЗА ЕУРО 2020

Велкоски: Со добар резултат од Австрија и Израел да ја задржиме добрата атмосфера

13. ноември 2019 - 17:52 | Ф.З.

Напаѓачот и капитен на босанскиот шампион Сарајево е редовен на репрезентативните собири, а последните два квалификациски натпревари ги гледа како генерална проба пред баражот во Лигата на нации.

„Мислам дека овие два натпревара ќе бидат навистина тешки, ни недостасуваат неколку фудбалери, но сепак имаме квалитет да се обидеме да освоиме што повеќе бодови и да останеме на третото место во групата.

Велковски константно е дел од ростерот на Ангеловски, но како резервна варијанта во офанзивата. Последен пат настапи пред една година кога ги одигра последните 8 минути во победата од 4:0 над Гибралтар во Скопје.

Со оглед на отсуствата поради повреди и суспензии на неколку стандардни играчи, можно е Велковски да добие шанса да покаже дека селекторот почесто треба да смета на него.

„Австрија е многу квалитетна репрезентација, играат одлични натпревари, но наше е да се потрудиме да одиграме на високо ниво и силно да се спротивставиме. Ритамот на игра сигурно ќе биде на максимум, но и покрај отсуството на неколкумина фудбалери мислам дека физички сме подготвени за предизвикот“

За разлика од неговиот колега Александар Трајковски, Крсте е нешто порезервиран, односно пореален во очекувањата.

„Со добар резултат од овие два натпревара ќе ја задржиме атмосферата за тоа што веројатно нѐ очекува во март и натпреварот за пласман на Европското првенство“, изјави Крсте Велковски.

Коментирај