Најголемото изненадување ноќеска го приреди репрезентацијата на Венецуела која успеа да остане непоразена на гостувањето кај апсолутниот фаворит Бразил.
Ноќеска се одигра 3. коло од јужноамериканските квалификации за пласман на Мундијалот 2026. Колото го отвори интересниот дуел на Колумбија и Уругвај кој заврши 2:2, иако домашните на двапати водеа со головите на Хамес Родригес и Матеус Урибе. Уругвајците во два наврата израмнуваа, прво преку Матиас Оливера, а потоа во судиското надополнување преку Дарвин Нуњес од белата точка. Во тие моменти Колумбија беше со играч помалку откако Камило Варгас собра два жолти.
Стадион „Метрополитано Роберто Мелендес“, Баранкиља
Колумбија - Уругвај 2:2
35' Хамес Родригес, 52' Матеус Урибе - 47' Матиас Оливера, 90'+1 Дарвин Нуњес
Еквадор забележа важна победа на незгодното гостување кај Боливија во Ла Пас, град со голема надморска височина. Гостите поведоа преку Кендри Паес во последната минута пред паузата, а се чинеше Боливија дека ќе дојде до бод кога Родриго Рамаљо израмни на 7 минути до крајот. Длабоко во судиското надополнување, во 6. минута, Кевин Родригес го замолкна „Ернандо Силес“ стадионот постигнувајќи победнички гол.
Стадион „Ернандо Силес“, Ла Пас
Боливија - Еквадор 1:2
83' Родриго Рамаљо - 45' Кендри Паес, 90'+6 Кевин Родригес
Актуелниот светски шампион Аргентина важеше за голем фаворит против Парагвај. Кога Отаменди по само три минути игра го отвори резултатот, 84-илјадната публика очекуваше голеада, но резултатот заглави на 1:0. Аргентинците упатија дури 17 удари кон голот на Карлос Коронел, но реализацијата беше на незадоволително ниво. Лео Меси почна од клупата и влезе во игра во 53. минута, а нападот од почетокот го предводеа Лаутаро Мартинес, Хулиан Алварес и Нико Гонсалес. Сепак, ги освоија планираните три бода.
Стадион „Монументал“, Буенос Аирес
Аргентина - Парагвај 1:0
3' Николас Отаменди
Чиле ја запиша првата победа во овие квалификации откако во последните дваесетина минути успеа да го скрши отпорот на Перу. Диего Валдес го отвори резултатот, а играчот на Фејнорд, Маркос Лопес, со комичен автогол ја запечати победата на Чилеанците.
Стадион „Монументал Давид Арељано“, Сантјаго де Чиле
Чиле - Перу 2:0
74' Диего Валдес, 90'+1 (аг) Маркос Лопес
Последен стартуваше дуелот на гигантот Бразил против аутсајдерот Венецуела, единствената јужноамериканска репрезентација која никогаш не успеала да се пласира на Мундијал. Откако по првите 45 минути не успеаја да го скршат отпорот на гостите, Бразилците конечно погодија преку Габриел во 50-тата минута, на асистенција на Нејмар од корнер. Но, гостите приредија студен туш на пет минути пред крајот кога Едуард Бељо израмни со гол во бразилски стил. Бразил не успеа до последниот свиреж да постигне втор гол, па загуби планирани бодови против големиот аутсајдер, и тоа на домашен терен.
Стадион „Арена Пантанал“, Кујаба
Бразил - Венецуела 1:1
50' Габриел - 85' Едуард Бељо
