Нов земјотрес со магнитуда од 6 степени по Рихтер е регистриран ноќта од саботата кон неделата во близина на североисточниот брег на Јапонија, трет силен потрес во нецели три дена во оваа област но кој не се заканува со предизвикување цунами, наведуваат властите кои не објавија податоци за евентуално настрадани и штети.
Новиот земјотрес бил регистриран во 17,58 часот во саботата по средноевропско време, околу 170 километри од градот Мијаки, според податоците на Американскиот геолошки институт (USGS). Како и последните потреси, регистриран на длабочина од околу 10 километри во морето. Не е испратени предупредување за цунами, потврди јапонската метеоролошка агенција.
Претходно во саботата околу беше известено за потрес со истата јачина во истата област, додека во петокот во истото подрачје беше регистриран земјотрес со магнитуда од 5,3, во морето јужно од Фукушима и тој не предизвика жртви и штети.
Јапонија, која се наоѓа на спојот на четири тектонски плочи, секоја година регистрира повеќе од 20 отсто од најсилните потреси во светот.
Во април годинава беше регистрирана серија силни земјотреси на југозападот од Јапонија во кои загинаа околу 50 лица. Тогаш во префектурата Кумамото беа регистрирани повеќе од 1.700 афтершокови.
Во март 2011 година силен подземен потрес во морето со магнитуда 9 предизвика гигантско цунами со бранови до речиси десет метри, кое усмрти 18.000 луѓе и предизвика нуклеарна катастрофа во централата Фукушима.