Коалицијата милијардери предводена од Бил Гејтс своето богатство го вложува во стартап што се обидува да открие нови наоѓалишта на кобалт.
Со надеж дека на светот постојат уште извори на металот што благодарение на неговата употреба во изработката на електричните автомобили стана една од најбараните суровини во светот, Kobold Metals смисли алгоритми со чија помош ќе ја истражува Земјината кора.
Компанијата доби пари од инвестициски компании од Силициумската долина Andreessen Horowitz и фондот Breakthrough Energy Ventures кои се финансирани, ни помалку ни повеќе, туку баш од Бил Гејтс и десетина други бизнисмени меѓу кои и најбогатиот човек на светот Џеф Безос, Џек Ма, Реј Далио и Мајкл Блумберг.
„Она што го создаваме е всушност Google Maps за Земјината кора и она што се наоѓа под неа“, рече Кони Чан од Andreessen Horowitz.
Дури две третини од кобалтот се ископува од Демократската Република Конго, а Kobold Metals веќе купи неколку земјишта во Северна Америка на кои се надева дека ќе го најде овој баран метал.
Планираат до крајот на годината да поседуваат најмалку десет нови наоѓалишта.