Хроника

Во сообраќајна несреќа во Словачка загинаа 12 лица

13. ноември 2019 - 18:05 | МИА

Братислава, 13 ноември 2019 (МИА) – Најмалку 12 лица, од кои 4 деца, загинаа денеска во судир на автобус и камион во западниот дел на Словачка.

Во несреќата, што се случила околу 13 часот во близина на градот Нитра, 100 километри источно од Братислава, повредени се најмалку 17 лица. Со хеликоптер тие веднаш се префрлени во болница.

Словачките медиуми известуваат дека во автобусот претежно биле средношколци. Министерката за здравство Андреа Калваска рече дека меѓу жртвите има и 4 деца, но не прецизираше на која возраст.

– Во овој момент, нашите мисли се со родителите кои изгубија дете. Сите се надеваме дека бројот на жртви нема да се зголемува, изјави претседателката на Словачка, Зузана Чапутова.

Словачкиот премиер Петер Пелегрини поради несреќата, која ја окарактеризира како „ужасна трагедија“ од Кипар ќе се врати во земјата порано од предвиденото.

Во време на несреќата врнел дожд и лизгавиот коловоз се истакнува како една од можните причини за судирот.

Ова е најтешка сообраќајна несреќа во Словачка во последните 10 години. Во 2009 година, во судир меѓу автобус и воз загинаа исто така 12 лица.

Коментирај