Бројот на загинати во земјотресот кој се случи на 24 август во централна Италија, се зголеми на 278, а продолжува потрагата меѓу урнатините, иако се сè помали шансите дека може да бидат пронајдени преживеани, соопшти италијанската служба за цивилна заштита, ден пред денот на жалоста.
Претставник на службата за цивилна заштита на прес-конференцијата во Рим изјави дека лекарска помош досега побарале 388 луѓе, додека без покрив над главата останале 2.500 луѓе. Од 278 загинати, 218 се од местото Аматриче.
Пожарникарите и натаму трагаат по евентуално преживеани, но не можат да потврда дека се исчезнати уште најмалку 15 лица, како што тврди градоначалникот на Аматриче. Властите сè уште не можат со сигурност да кажат колку лица се водат како исчезнати, бидејќи ова старо живописно гратче во текот на летото е полно со туристи и многу жители на Рим кои таму имаат викенд куќи, и бројот на жителите двојно или тројно се зголемува. Од четвртокот не е пронајден ниеден преживеан.
„Ќе продолжиме да трагаме и да копаме додека не бидеме сигурни дека веќе нема никој“, изјави Луиџи Д’Анџело, локален функционер на цивилната заштита. Меѓутоа, урнатините започнаа да се отстрануваат со багери, што значи дека надежите дека би можело да има уште преживеани се сè помали, забележуваат медиумите.
Во Италија денеска е прогласен ден на жалоста. Знамињата ќе бидат спуштени на половина копје во целата земја поради погребот на жртвите од Арквата дел Тронто, едно од трите населби на Апенините кои беа најтешко погодени од земјотресот. На погребот на триесетината жртви, вклучително и неколку деца во Асколи Пичено, во подножјето на планините, ќе присуствуваат италијанскиот претседател Серџо Матарела и премиерот Ренци.
