Германскиот автомобилски гигант само што го претстави новиот Golf 8, а најљубопитните веќе почнаа да се распрашуваат за наследникот.
Volkswagen со месеци беше главна тема на шпекулации, а сега е актуелна тема на анализи.
„Осумката“ има 11 погонски решенија, а од седиштето во Волфсбург тврдат дека новите модели трошат за 17% помалку од претходните генерации. Особено се горди на хибридите.
Мора да се признае дека Volkswagen навистина направи исчекор, додека во дизајнерски поглед се задржа на препознатливата естетика на Golf.
Иако се навикнавме секој ден да има барем една новост од Volkswagen, сепак изненади веста дека веќе има некаква информација за наследникот на новиот Golf.
Не помина ни цела недела од премиерата на Golf 8, a екипата на Top Gear веќе се заинтересира што следно ќе се подготвува во Волфсбург.
На прашањето за судбината на моторите со внатрешно согорување, Ларс Хентшел од одделението за развој на мотори во VW потврди дека и за десет години од сега ќе може да купиме автомобил со погон на фосилно гориво. И тоа новиот Golf.
„Нема шанси за стопроцентна електрификација до 2030 година. Дури ни мојот шеф, господин Дајс, не е ентузијаст. Тоа би било премногу. Мора да има нови генерации, уверен сум во тоа“, изјави тој за Top Gear.
Да, Golf ќе продолжи да живее, а деветтата генерација би требало да се појави на сцена најрано во 2027 година, имајќи го предвид просечниот век на една генерација на модел од седум години.
