На Волстрит, берзанските индекси паднаа бидејќи посилниот од очекуваниот пораст на цените на производителите во САД ги намали изгледите дека американската централна банка ќе почне да ги намалува каматните стапки во јуни.
Индексот Dow Jones загуби 0,35 отсто, на 38.905 поени, додека индексот S&P се лизна за 0,29 отсто, на 5.150 поени, а индексот Nasdaq 0,30 отсто, на 16.128 поени.
Најновите податоци покажаа дека цените на производителите во САД се зголемија за 0,6 отсто во февруари, двојно повеќе од очекуваното, најмногу поради повисоките цени на бензинот и храната.
Ова поттикна корекција на цените на акциите во секторите за комунални услуги и недвижности, кои се чувствителни на промените на каматните стапки.
Цената на акцијата на технолошката ѕвезда Nvidia падна, од друга страна, за 3,2 отсто, повлекувајќи го целиот сектор пониско во просек за 1,8 отсто.
Од почетокот на неделата, секторот на производители на чипови падна за 3,5 отсто бидејќи инвеститорите решија да извадат дел од профитот од пазарот по неодамнешниот остар скок на нивните цени.
Следната недела инвеститорите ќе се фокусираат на состанокот на ФЕД. Се очекува централната банка да ги остави каматните стапки непроменети, а бидејќи инфлацијата остана покачена во последните два месеци, сè помалку е веројатно дека ФЕД ќе ги намали каматните стапки во јуни.
„Ако ја погледнеме вкупната инфлација, таа остана покачена во изминатите два месеци, но пазарот некако расте. ФЕД можеби нема да ја олабави монетарната политика оваа година колку што пазарот сакаше, но изгледите за натамошно затегнување сè уште се многу мал“, вели Тони Велч, главен директор за инвестиции на SignatureFD.
Од почетокот на годината, сепак, индексот S&P 500 сè уште е во пораст за приближно 8 проценти.
И на повеќето европски берзи цените на акциите завчера паднаа. Лондонскиот FTSE индекс се лизна за 0,37 отсто, на 7.743 поени, а франкфуртски DAX 0,11 отсто, на 17.942 поени. Парискиот CAC зајакна, пак, за 0,29 отсто, на 8.161 поен.