Volvo планира во следните пет години да произведе автомобил кој ќе може автономно да вози по автопат без помош од возачот. Во раната фаза на проектот, шведската компанија уште следната година, на патиштата во околината на Гетеборг, Лондон, но и во Кина, ќе почне со тестирање со по 100 автомобили со автопилот.
За разлика од другите компании кои развиваат слични системи, автомобилите нема да ги возат инженери или вработени во Volvo, туку обични луѓе, сопственици на автомобили од овој бренд.
Според пишувањето на Autonews, Volvo се уште е во потрага по партнер кој ќе му помогне да ја достигне зацртаната цел за пет години.
„Нашата амбиција е до 2021 година да имаме возило кое целосно автоматски ќе може да вози по автопатиштата“ - изјави првиот човек на Volvo, Хокан Самуелсон и објасни дека за такво нешто им е потребен партнер, бидејќи автомобилската компанија не може самостојно да ја развие технологијата за авто-пилотот.
Со оглед на тоа дека Volvo има репутација на производство на исклучително безбедни автомобили, очекувањата се дека компанијата при имплементацијата на оваа технологија ќе ги избегне потенцијалните ризици и нема да остави ништо на случајностите.