Изгледа дека една година беше доволна за раководството на Феникс Санс да се увери дека Србинот Игор Кокошков не е вистинскиот кандидат за тренерската позиција. Утрово клубот ја потврди информацијата за неговото отпуштање и веќе од утре ќе започне аудиција за следен тренер на младиот и перспективен состав на Санс.
Првиот НБА тренер роден во Европа беше отпуштен по само една година на клупата на Феникс Санс, две недели откако заврши регуларната сезона во лигата.
Игор Кокошков го предводеше тимот на Феникс Санс до најлошиот скор во Западната конференција (19-63), што стана вообичаена пракса за тимот. Кокошков на располагање имаше млади и талентирани играчи како Девин Букер, Деандре Ејтон и Кели Убре Џуниор, но располагаше со навистина мал избор на плејмејкерската позиција пред на тимот да му се придружи Тајлер Џонсон, кој пристигна во февруари.
„По долго размислување, дојдов до одлука дека најдобро за тимот би било да побараме други опции за тренерската позиција. Сакам да му се заблагодарам на Игор за неговата работа оваа сезона и му посакувам многу среќа во идните вработувања“, изјави Џејмс Џонс, претседателот за кошаркарски операции на Феникс Санс.
Како значаен дел од НБА лигата во последните 18 години, Кокошков може да се пофали со ангажманите како асистент на неколку НБА тимови, меѓу кои последен таков ангажман беше во Јута Џез. Тој дополнително го изгради неговото име како селектор на репрезентацијата на Словенија, со која го освои златниот медал на Европското првенство во 2017 година.
Според ESPN, фаворит за новоотворената тренерска позиција во Феникс Санс е актуелниот асистент на Филаделфија Севентисиксерс, Монти Вилијамс. Тој се споменува како прв избор и на тимот на Лос Анџелес Лејкерс, кој неодамна го отпушти Лук Волтон.