Регион

Врз основа на сукцесија на Југославија, Хрватска бара од Србија 148 милиони долари

13. ноември 2019 - 17:22 | МИА

Белград, 13 ноември 2019 (МИА) – Во моментот на распаѓањето на Југославија девизните сметки во мешовитите банки на поранешната држава во странство изнесуваа 645,55 милиони американски долари, што според Договорот за сукцесија требаше да ги поделат државите наследнички на СФР Југосавија, но Србија има потрошено најголем дел од парите, така што Хрватска од неа побарува 148,5 милиони долари, објави денеска загребачкиот весник Večernji list.

Хрватска има докази дека заедничките пари во 1990-тите биле користени за плаќање на странски долгови на српските компании и дека оваа земја конкретно им наложила на банките да не ги користат за други републики.

Весникот наведува дека во моментот на распадот на поранешната држава, на девизната сметка во мешовити банки на Југославија имало 645,55 милиони американски долари.

Според весникот, во пресрет на разговорите за поделба, Србија ги известила другите наследници дека на сметката има 56 милиони, одбивајќи да објасни каде се парите.

Бидејќи парите, според Договорот за сукцесија требаше да ги поделат државите наследници, со тоа што на Хрватска да ѝ припаднат 23 проценти, или 148,5 милиони американски долари, таа држава сега во процесот на сукцесија тие пари ги бара од Србија.

Večernji list наведува дека Хрватска, како домаќин на денешната средба на Постојаниот мешовит комитет, надлежен за контролирање на спроведување на сукцесијата, ќе ја постави како посебна точка темата за исчезнатите или незаконски потрошените средства.

Хрватска ќе инсистира на спроведување на Договорот за сукцесија, како и на изнаоѓање решение за компензација, доколку се покаже дека парите всушност се нелегално потрошени. Весникот смета дека отежнувачка околност е што сите одлуки донесени од комитетот се носат едногласно.

Постојаниот мешовит комитет е основан врз основа на Договорот за прашања од сукцесија, потпишан во Виена на 29 јуни 2001 година меѓу државите наследнички на СФРЈ, а стапи во сила три години подоцна. Последната средба се одржа пред четири години во Сараево.

Коментирај