Оперативните системи на Microsoft, Windows 7 и Windows 8.1, од 10 јануари ќе останат без безбедносни надградби и техничка поддршка.
Microsoft Edge 109 е последната верзија на прелистувачот што поддржува застарени оперативни системи, но не е единствениот прелистувач што крева раце од Windows 7 и 8.1. Google уште во октомври минатата година објави дека на 7 февруари оваа година неговиот Chrome ќе ја прекине поддршката за споменатите оперативни системи. Иако и двата прелистувача ќе работат на уреди што ги користат, клучните безбедносни надградби и новите функции повеќе нема да бидат достапни. Поддршката за WebView2, алатка која им овозможува на програмерите да вградуваат веб-базирана содржина во нивните апликации, исто така ќе биде прекината на 10 јануари.
Ова значи дека останува многу малку време за корисниците на машини кои сè уште работат со Windows 7, а ги има околу 100 милиони, да се префрлат на понов оперативен систем или на друг начин да се соочат со безбедносни ризици поради употребата на неподдржан оперативен систем и прелистувач.
Едно истражување објавено во октомври направено на 27 милиони Windows уреди покажа дека повеќе компјутери користат Windows XP, 7 или 8 отколку Windows 11.
Сепак, треба да се каже дека Microsoft ги известуваше корисниците навреме, а крајот на поддршката за Windows 7 за прв пат беше објавен во 2020 година. Корисниците кои сè уште ги добиваат надградбите се всушност оние кои платиле за дополнителните три години безбедносни закрпи.
