Кинеската компанија Xiaomi го откри првиот свитлив телефон преку кратко видео, во кое се прикажува како смартфонот се превиткува и може да заземе облик на таблет.
Коосновачот и претседател на Xiaomi, Лин Бин, го прикачи едноминутното видео на Weibo, и тоа беше претставено заедно со неколку детали за овој нов модел.
Кога уредот е расклопен, двете страни од него можат да се превиткаат наназад за да се трансформира од таблет во компактен телефон. За разлика од другите свитливи телефони кои беа претставени периодов, овој изгледа доста практично, пишува The Verge.
Бин откри дека уредот на видеото е само индустриски модел. Тој вели дека Xiaomi успеал да прејде преку проблемите како флексибилната технологија за превиткување на екранот, технологијата на флексибилност на маската, MIUI адаптацијата и слично.
Изгледа дека Xiaomi го има приспособено MIUI софтверот за потребите на свитливиот телефон. Во видеото може да се види како содржината се репродуцира на уредот додека Бин го склопува од таблет во смартфон.
Засега не е познато кога свитливиот смартфон на Xiaomi ќе се појави на пазарот, ниту пак колку ќе чини, но најавени се повеќе информации за време на Mobile World Congress, кој започнува за еден месец.
